髮型搵工入行:資深髮型師為大家分享入行點滴

有志於髮型行業?髮型搵工入行?

由年資達 25 年的髮型師「大隻佬(化名)」為大家分享行內苦與甘!

月薪 $15,000 – $20,000
做髮型師頂盡一個月都係 2 萬幾,做咗老闆開 salon 之後,最高峰月入試過 9 萬。

你要入行?

  • 一般入行要先洗頭 1-2 年,睇資質決定有冇得升做髮型師
  • 考試內容通常係剪 2-3 個頭,睇下識唔識揸鉸剪
  • 電髮、染髮啲手勢都會睇

給有心入行人士的提點

面皮要夠厚
你諗下,如果有個好靚好靚嘅女仔入嚟,著到好低胸,你怕醜走咗去咁點搞?哈哈!同埋如果遇到啲客太腌尖,喺咁鬧你,你走去駁嘴嘅又喺無得搞。

預咗要斷六親
因為你收工時間真喺無定。有時電髮,嗰客話你電得唔好,要即刻再電過。約親人食飯都遲出現/放飛機,真喺好多親戚朋友因為咁嬲咗我。

要頂得順啲味道
因為啲 lotion 有時好臭。如果你忍唔到,咁就無得搞。同埋隻手真喺濕水濕得多會爛手,就算搽 cream 都救唔返。

坊間傳言 你問我答

Q: 有冇遇過啲客有頭蝨?
A: 依家呢十年八年都無㗎啦。入行無耐嗰陣遇過一次,都成 18 年前啦!嗰時我仲未做髮型師,老細教我,用啲電髮藥水,再加焗油幫佢搽,拎佢個頭去焗,就可以去左啲蝨。依個真係深刻啲,哈哈,嚇到我全部啲衫全部都唔要。

Q: 做髮型師有咩好處?
A: 我哋啲衫褲鞋襪無人會偷嚟著,因為無人著到,哈哈!就算番到屋企,都係會成身頭髮,整極都有。有次我阿哥拎左我隻襪嚟著,一著就話:「嘩!拮嘅!」,即刻除返出嚟。不過我哋做咗咁多年,已經無哂感覺,唔會覺得拮。

Q: 做髮型師有咩要注意?
A: 我哋成日都會食左啲頭髮落肚,有時幫人剷青,啲頭髮碎你睇唔到,食飯又會跌左啲頭髮落去食咗。食多啲豬紅,滑腸,可以痾返啲頭髮出嚟。

Q: 最鍾意呢份工咩?
A: 唔需要太多勞動,無咩搬搬抬抬嘅野要做。同埋見得人多,尤其喺靚女。(哈哈哈!依啲可以照寫,出得街㗎!)

Q: 最憎呢份工咩?
A: 啲無理取鬧嘅客囉,即係師奶。話左要剪到露耳仔,剪完又話做咩剪到咁短,突然發哂癲咁喺度鬧。

Q: 最高峰試過一日剪幾多個頭?
A: 之前喺嗰啲咩 QB House 度做啊。嘩!好誇張!有朋友試過一日剪五、六十個,我自己就四、五十個啦。通常去得嗰度剪嘅髮型師都係無咩 heart 嘅,剪得好樣衰。

Q: 髮型師同 salon 通常係點拆帳?
A: 睇下你咩公司。以我自己經驗嚟講,頭 3 個月就「包月」,即係每個月出一舊錢畀你。之後開始有客,就六四。 Salon 六、我四。如果係 freelance,啲客係自己客,咁就七三。Salon 三,髮型師七。

Q: 係咪電髮賺得最多錢?
A: 梗係啦!電一次髮,就算係好靚好靚嘅藥水,成本其實都係百幾蚊,但係收千幾蚊唔係淨係睇藥水。講真畀啲藥水你都唔識用!即係好似醫生咁,佢啲藥成本都係幾蚊粒咋嘛,但睇一次醫生點解收咁貴?係睇嗰個人經驗。

Q: 做髮型師係咪要好口甜舌滑?
A: 咁讚美嘅說話係一定要,哈哈!啲客入嚟都係想扮靚,你搞到佢嬲爆爆咁走既就無謂。

Q: 「師傅」、「stylist」、「designer」其實有咩分別?
A: 無分別,都係名稱嚟㗎啫!其實我哋呢行都係講包裝。應該咁講,個分別喺個地區度囉!喺深水埗嗰啲咪叫師傅,中環嗰啲咪叫自己做 designer、stylist。

Q: 做髮型師行內有咩禁忌?
A: 唔可以掃得啲頭髮咁乾淨。(點解?)咩啊嘛…(咩?)「發發」聲啊嘛!太乾淨掃哂啲頭髮咪無「發」囉!留髮留髮,留發留發啊嘛!

Q: 日本做髮型師就要考試,拎左個公開資格先,香港使唔使㗎?
A: 而家無,但係好似話政府遲啲會搞,要拎咗個牌照先至可以做,不過我都係聽返嚟。我覺得係要㗎,之前識個阿嬸,喺嗰啲咩展翅計劃學咗剪頭髮就話自己係髮型師喎!嘩!

大家睇完之後,係咪想躍躍欲試呢?心動不如行動,即刻去髮型搵工入行睇下邊度請人啦!

#hair #stylist #salon #搵工 #請人 #髮型 #招聘 #入行 #髮型搵工入行

喜歡這篇請分享

Share on facebook
Share on telegram
Share on whatsapp
Share on linkedin
Share on twitter
Share on email

最新文章

× 聯絡我們